गुल्मी । गुल्मीमा एक दम्पतीले ६५ लाख लगानीमा बाख्रापालन व्यवसाय सुरु गरेका छन् । छत्रकोट गाउँपालिका-३ काउलीका नारायणप्रसाद पन्थ र पार्वती थापा पन्थले आधुनिक खोरसहित बाख्रापालन गरिरहेका हुन् ।

पन्थ दम्पतीले बाख्रापालनसँगै, घाँसखेती र सुन्तला खेती पनि गरेका छन् । पन्थ दम्पतीको खोरमा ४० माउ बाख्रा छन् भने उनीहरूले ४० रोपनी जग्गामा घाँसखेती र आठ रोपनी जग्गामा सुन्तला खेती गरेका छन् ।

पर्देश गएर १० वर्षसम्म कमाएको रकम आफ्नै गाउँ-ठाउँमा केही व्यवसाय गर्ने उद्देश्यसहित बाख्रापालन सुरु गरेको नारायणप्रसादले बताए ।

विश्वभर फैलिएको पहिलो चरणको कोरोना महामारीको समयमा कतारबाट फर्किएर कृषि र पशुपालनबाटै दिगो आर्थिक उपार्जन हुने अपेक्षासहित पन्थ दम्पतीले छत्रदेवी कृषि तथा पशुपक्षी फर्म दर्ता गरेर व्यवसाय सुरु गरेका हुन् ।

घाँस र सुन्तला खेतीबाट वार्षिक छ लाख आम्दानी हुँदै आएको नारायणप्रसादको भनाइ छ । पन्थ दम्पतीले घाँस खेतीअन्तर्गत किम्बु, राईखन्यु, नेपियर, ग्वाटेमाला, मूलाटोलगायत बिरूवा रोपेका छन् ।

‘घरपरिवारसँगै बसेर कृषि र पशुपालन गर्दा समय वितेको पत्तै नलाग्दो रहेछ’, उनले भने । यसअघि कतारमा मासिक एक लाख २० हजारसम्म कमाउने गरेको नारायणप्रसादको भनाइ छ ।

श्रीमानले विदेशमा भन्दा गाउँमै जीविकोपार्जनको नयाँ बाटो रोजेकामा पार्वती सन्तुष्ट छिन् । श्रीमानको १० वर्षे वैदेशिक अनुभवले गाउँमै व्यवसाय गर्न सहज भएको पार्वतीको भनाइ छ ।

आधुनिक खोर, घाँस काट्नका लागि च्याँपकटर, दानाका लागि कुटानीपिसानी मिल, मूत्र व्यवस्थापन र साना-ठूला बाख्राका लागि छुट्टाछुट्टै खोर बनाएर पन्थ दम्पती व्यवसायमा होमिएका हुन् । उनीहरूसँग जमुना पारी र खरी जातका स्थानीय बाख्रा छन् ।

फार्मलाई छत्रकोट गाउँपालिकाले दुई लाख, कृषि ज्ञान केन्द्रले एक लाख र भेटेरिनरी अस्पताल तथा पशु सेवा विज्ञ केन्द्र तम्घास गुल्मीले एक लाख अनुदान सहयोग गरेको छ ।

कृषि ज्ञान केन्द्रका प्रमुख नवराज भण्डारीले कृषि र पशुपालनमा समर्पित किसानको साथमा रहेको बताए । छत्रकोट गाउँपालिकाका अध्यक्ष रामप्रसाद पाण्डेले कृषि र पशुपालनमा लामो समयसम्म टिकाइ राख्नका लागि योजना बनाइरहेको जानकारी दिए ।