वेबटिभी खबर
काठमाडौं । सर्वोच्च अदालतका न्यायाधीशहरु महाअभियोग सिफारिस समितिले बोलाएको छलफलमा सहभागी नहुने भएका छन्। सर्वोच्चका कुनै पनि न्यायाधीश समितिको छलफलमा सहभागी नहुने भएका हुन्।
सिफारिस समितिले बिहीबार बिहान साढे ८ बजे सर्वोच्चका ६ जना न्यायाधीशलाई पत्र पठाएर सोधपुछका लागि बोलाएको थियो। समितिले न्यायाधीशहरुलाई महाअभियोगको कारबाही प्रक्रियाका सन्दर्भमा सोधपुछ तथा सवाल जवाफ गर्न बोलाएको थियो।
स्वतन्त्र न्यायपालिका, शक्ति पृथकीकरणको सिद्धान्त र नेपालको संविधानले अंगिकार गरेको मान्यताहरु समेतका कुनै पनि दृष्टिले संविधानसम्मत, उचित र शोभनीय नहुने भएकाले न्यायाधीशहरु छलफलमा सहभागी नहुने सर्वोच्चले जनाएको छ।
महाअभियोग सिफारिस समितिलाई सर्वोच्चका कामु रजिस्ट्रार नारायण प्रसाद पन्थीले पठाएको पत्रमा शक्ति पृथकीकरणको सिद्धान्तअनुसार समितिमा उपस्थित हुन नमिल्ने उल्लेख छ। पत्रमा भनिएको छ, ‘महाभियोगसम्बन्धी कारबाही प्रक्रियाका सन्दर्भमा यस अदालतका न्यायाधीशले उपरोक्त लेखी आएअनुसार महाभियोग सिफारिस समितिमा उपस्थित हुनु र निजसँग सोधपुछ, सवाल–जवाफ गरिनु स्वतन्त्र न्यायपालिका, शक्तिपृथकीकरणको सिद्धान्त र नेपालको संविधानले अङ्गिकार गरेका मान्यताहरू समेतका कुनै पनि दृष्टिले संविधानसम्मत्, उचित र शोभनीय नहुने हुँदा प्राप्त हुन आएको पत्रानुसार कोही पनि न्यायाधीश उपस्थित हुन नमिल्ने भएकोले यस अदालतको पूर्ण बैठकबाट निर्णय भएको बेहोरा जानकारीको लागि अनुरोध गर्दछु।’
Copyright © All right reserved to webtvkhabar.com Site By: Sobij
