नयाँ दिल्ली । भारतको झारखण्ड राज्यको देवघरमा केबलकार अड्किँदा आइतबार साँझदेखि १२ वटा ट्रलिमा रोकिएका करिब ५० यात्रुको उद्धार हुन सकेको छैन । 

सेनाको हेलिकोप्टरबाट उद्धारको प्रयास भए साेमबार मध्याह्नसम्म पनि सफल हुन सकेको छैन् । भारतीय सञ्चारमाध्यमका अनुसार दुई हजार फिटको उचाइमा अड्किएका पर्यटकलाई आइतबार रातिदेखि नै उद्धारको प्रयास थालिए पनि सफलता हात नलागेकाे हाे । 

भारतीय एयरफोर्सको दुई वटा हेलिकोप्टर उद्धारको लागि खटिएको छ । उद्धार टोलीले तारमा अड्केर दुई हजार फिटमाथि नै केबुलकारमा रोकिएका यात्रुलाई खाना र पानी दिने प्रयास गरे पनि असफल भएको भारतीय सञ्चारमाध्यमले उल्लेख गरेका छन् । 

उद्धारमा खटिएका हेलिकोप्टरलाई त्यस क्षेत्रमा तानिएका तारका कारण उद्धारमा कठिनाई भइरहेको बताइएको छ । देवघरदेखि २२ किलोमिटर टाढा त्रिकुट पहाडमा यो घटना भएको हो । रामनवमीको अवसरमा ठूलो संख्यामा पुगेका पर्यटक केबुलकार चढेर आनन्द लिइरहेको बेला घटना भएको थियो ।

केबुलकारको तार चुँडिएर एउटा ट्रलि (डब्बा) तल झरेको भारतीय सञ्चारमाध्यमले बताएका छन् । घटनामा परेर दुई जनाको मृत्यु र सातजना घाइते भएको भारतीय अनलाइन पोर्टल लाइभहिन्दुस्तानले उल्लेख गरेको छ । सात जनालाई उद्धार गरिएको छ भने १२ वटा ट्रलिमा रहेका करिब ५० जना उद्धारको प्रतिक्षामा छन् । 

देवघरका डेपुटी कमिस्नर मञ्जुनाथ भजत्रीले सबै पर्यटक सम्पर्कमै रहेको र उद्धारका लागि प्रयास भइरहेको जानकारी दिए । नेपालकाे चन्द्रागिरिमा पनि गत चैत १५ गते डेढ घण्टा केबुलकार राेकिएकाे थियाे । त्यसक्रममा ३७ यात्रु अड्किएका थिए । 

चन्द्रागिरि केबलकारमा ३७ यात्रु थुनिएपछि...