वेबटिभी खबर
काठमाडौं । लोकतान्त्रिक समाजवादी पार्टी, नेपाल (लोसपा) का अध्यक्ष महन्थ ठाकुर र वरिष्ठ नेता राजेन्द्र महतोको समबन्ध चिसिएकै कारण पार्टी गठन भएको ५ महिना भइसक्दा पनि कार्यकारिणी समितिको बैठक बस्न सकेको छैन ।
तत्कालीन जनता समाजवादी पार्टी,नेपाल (जसपा) बाट विभाजित भई यही ९ भदौमा लोसपा गठन भएको हो । पार्टी गठन भएदेखि नै कार्यकारिणी समितिको बैठक बस्न नसकेको हाे ।
पार्टीका प्रदेश अध्यक्ष, सचिव, जिल्ला अध्यक्ष, पर्यवेक्षक चयनमा महन्थ ठाकुरले एकलौटी गरेको भन्दै वरिष्ठ नेता महतो अहिले उनीसँग टाढिएका छन् । महतो पार्टी कार्यालय जान छाडेको धेरै भइसक्यो ।
वरिष्ठ नेतासँग सम्बन्ध चिसिएका कारण कार्यकारिणी बैठक बस्ने सम्भावना पनि टर्दै गएको छ । यस्तो बेला कार्यकारिणी बैठक राख्दा पार्टीमा विवाद बढ्ने आँकलन पनि गरिएको छ ।
ठाकुर र महतोबीच दूरी बढ्यो, पार्टी कार्यालय पनि जाँदैनन् महतो
कार्यकारिणी समितिको बैठक बस्न नसक्दा राजनीतिक समिति र केन्द्रीय समितिसहित भातृ र शुभेच्छुक संस्थाहरू गठन पनि हुन सकेको छैनन् ।
एक पटक पनि कार्यकारिणी समिति बैठक नबस्दै दुई जनाले पार्टी छाडेका छन् । ३१ सदस्सीय कार्यकारिणी समितिमा रहेका राजकुमार लेखी नेकपा एमाले प्रवेश गरेका छन् भने अर्का सदस्य तथा प्रतिनिधिसभाका निलम्बित सांसद रेशम चौधरीले श्रीमती रञ्जिता श्रेष्ठको नामवाट नागरिक उन्मुक्ति पार्टी दर्ता गरेका छन् ।
Copyright © All right reserved to webtvkhabar.com Site By: Sobij