वेबटिभी खबर
जनकपुर । खानेपानी डिभिजन कार्यालय जनकपुरका कार्यालय प्रमुख जागेश्वर कुशवाहमाथि सिके राउत नेतृत्वकाे जनमत पार्टीका कार्यकर्ताले दुर्व्यवहार गरेका छन् । कुशवाहलाई नियन्त्रणमा लिएर कार्यकर्ताहरुले अर्धनग्न बनाई बजार परिक्रममा गरेका छन् ।
सडक विस्तारका क्रममा खानेपानीको पाइप ठाउँठाउँमा फुटेको र उक्त फुटेको पाइप मर्मत गर्न आग्रह गर्दा कुशवाहले जनकपुर नगरपालिकातिर जिम्मेवारी देखाउँदै आएको आरोप छ । सोही विषयमा विवाद हुँदा सिके राउतका कार्यकर्ताले उनीमाथि दुर्व्यवहार गरेका हुन् ।
यसैबीच दुर्व्यवहार गरेको आरोपमा प्रहरीले जनमत पार्टीका कार्यकर्ता विजयकुमार यादवसहित सात जनालाई पक्राउ गरेको छ । पक्राउ परेका कार्यकर्तालाई रिहाइको माग गर्दै जिल्ला प्रहरी कार्यालय अगाडी नरा जुलुस भइरहेको छ ।
जनमत पार्टीका कार्यकर्ताले भने यसअघि जनकपुर उपमहानगरपालिका र खानेपानी कार्यालयलाई ज्ञापनपत्र बुझाइएकाे, नटेरेपछि तालाबन्दी गरिएको र अख्तियार दुरुपयोग अनुसन्धान आयोगको कार्यालयलाई पनि ज्ञापनपत्र बुझाउँदा पनि बेवास्ता गरेपछि आजको घटना भएको जनाएको छ ।
भ्रष्टाचार रोकथामका लागि बारम्बार गरिएको आग्रह र प्रयासका बाबजुद भ्रष्टाचारमा मग्न हुँदाको परिणाम भन्दै उक्त घटनाको पार्टीले बचाउ गरेको हो ।
Copyright © All right reserved to webtvkhabar.com Site By: Sobij
