वेबटिभी खबर
काठमाडौं । सिन्धुपाल्चोकस्थित मेलम्ची र इन्द्रावती नदीको बाढीले प्रभावित भएका जनताले राहत पाउनुपर्ने माग गर्दै सत्तारुढ नेकपा एमाले बागमती प्रदेश कमिटीले प्रधानमन्त्री केपी शर्मा ओलीलाई ज्ञापनपत्र बुझाएको छ । शुक्रबार प्रधानमन्त्री निवास बालुवाटार पुगेर एमाले बागमती प्रदेश कमिटीका अध्यक्ष आनन्द पोखरेलसहितको टोलीले ज्ञापनपत्र बुझाएको हो ।
ज्ञापनपत्रमा सिन्धुपाल्चोक बाढीमा परी मृतक भएकाका परिवारलाई क्षतिपूर्ति र राहत तथा विस्थापित ४ सय परिवारलाई राहत र पुनर्स्थापनाको माग गरिएको छ । सत्तारुढ एमालेका अध्यक्षसमेत रहेका ओलीसँग नदी नियन्त्रण, खानेपानी, विद्युत, सडक, पुललगायतका क्षतिग्रस्त संरचनाको तत्काल पुनःनिर्माण गर्न पनि कमिटीले ज्ञापनपत्रमार्फत ध्यानाकर्षण गराएको छ ।
कमिटी अध्यक्ष पोखरेलले बाढीपीडितको पुनर्स्थापनाका लागि आफूहरुले दिएको सुझावमा प्रधानमन्त्रीबाट सकारात्मक प्रतिक्रिया आएको बताए । १ असार साँझदेखि २ दिनसम्म मेलम्ची, इन्द्रावती, याङ्ग्री र लार्के नदीमा आएको बाढीमा परी जिल्लाका १६ जनाको निधन भएको छ भने करिब ४ सय परिवार विस्थापित भएका छन् ।
बाढीले इन्टरनेटका केबुल बगाएको छ भने र विद्युत र टेलिफोनका तार रहेका पोल ढलेर सेवा अवरुद्ध भएको छ । विभिन्न सडकका पक्की पुल बाढीले पूर्ण रुपमा बगाएपछि यातायात र ढुवानी सेवा प्रभावित बनेको छ । यसतर्फ पनि कमिटीले प्रधानमन्त्रीको ध्यानाकर्षण गराएको छ ।
Copyright © All right reserved to webtvkhabar.com Site By: Sobij
