वेबटिभी खबर
काठमाडौं । सिन्धुपाल्चोकको मेलम्ची बजारका बाढीपीडितलाई राहत बाँड्न नेकपा एमालेसम्वद्ध अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का नेताहरु त्यसतर्फ प्रस्थान गरेका छन् ।
मंगलबार साँझदेखि परेको अविरल वर्षाका कारण सिन्धुपाल्चोकको मेलम्ची र इन्द्रवती नदीमा बाढी आएपछि मेलम्ची बजारक्षेत्रसहित जिल्लाका अधिकांश स्थानमा भौतिक र मानवीय क्षति भएको छ ।
एमालेका महासचिव ईश्वर पोखरेलको निर्देशनमा अनेरास्ववियुका नेताहरु बाढी, पहिरोपीडितलाई राहत सामग्री बाँड्न पार्टीको केन्द्रीय कार्यालय थापाथलीबाट सिन्धुपाल्चोक लागेका हुन् ।
राहत बाँड्न जानका लागि उनीहरुलाई बुधबार अपरान्ह महाससचिव पोखरेलले पार्टी कार्यालयबाट बिदाइ गरेका छन् ।
‘सिन्धुपाल्चोकका बाढी र पहिरो पीडितको उद्धार र राहतमा अनेरास्ववियुले कुशलतापूर्वक भूमिका खेल्ने विश्वास लिएको छु,’ पूर्वउपप्रधानमन्त्रीसमेत रहेका पोखरेलले बताए ।
पोखरेलले प्राकृतिक विपत्तिमा परेका नागरिलाई राहत र उद्धार गर्न एमाले कार्यकर्तालाई संगठित भएर लाग्न निर्देशनसमेत दिएका छन् ।
‘प्राकृतिक विपत्तिको यस घडीमा एमालेका सम्पूर्ण नेता तथा कार्यकर्ताहरूलाई पीडितहरूको राहत र उद्धारका लागि संगठित ढंगले सहयोग पुर्याउन र आफ्नो संगठित शक्तिलाई परिचालित गर्न आह्वान गर्दछु,’ पोखरेलले फेसबुकमार्फत भनेका छन् ।
बुधबार दिउँसो पनि महासचिव पोखरेलले पार्टीका तर्फबाट कार्यकर्तालाई यस्तै निर्देशन दिएका थिए ।
Copyright © All right reserved to webtvkhabar.com Site By: Sobij
