वेबटिभी खबर
जनकपुर । धनुषाको मुखियापट्टी मुसहरनिया गाउँपालिका-६ स्थित पोखरीमा डेबेर मृत्यु भएका पाँच बालिकाको परिवारलाई प्रदेश २ सरकारले जनही एक लाख राहत दिने भएको छ ।
घर नजिकको पोखरीमा नुहाउन जाँदा शुक्रबार एकै गाउँका पाँच बालिकाको डुबेर मृत्यु भएको थियो । यो घटनाले अहिलेसम्म पुरै गाउँ शोकमा डुबेको छ ।
पोखरीमा डुबेर पल्टु यादवकी १२ वर्षीया छोरी लक्ष्मीनिया, जोगिन्द्र भगतकी १० वर्षीया छोरी चन्द्रकुमारी, राजगिर पूर्वेकी १३ वर्षीया छोरी मञ्जु, जगरनाथ ठाकुरकी १२ वर्षीया छोरी चान्दनी र उतिम साह तेलीकी १२ वर्षीया नातिनी ललिताको मृत्यु भएको थियो ।
मृत्यु भएका पाँच बालिकाका परिवारलाई प्रदेश नं २ सरकारले राहतस्वरूप जनही एक लाख दिने घोषणा सरकारका तर्फबाट नवनियुक्त भौतिक पूर्वाधार तथा यातायातमन्त्री रामसरोज यादवले गरे । उनी सोही क्षेत्रबाट निर्वाचित भएक हुन् ।
प्रादेशिक अस्पतालमा मृतक बालिकाको शव परीक्षणपश्चात परिवारलाई जिम्मा लगाउने बेला अस्पताल पुगेर मन्त्री यादवले पीडित परिवारजनलाई भेटेर समवेदना प्रकट गर्दै राहत रकमको घोषणा गरेका थिए ।
सोही क्षेत्रबाट एमालेकी समानुपातिक सांसद तथा निर्वतमान महिला, बालबालिका तथा ज्येष्ठ नागरिकमन्त्री जुली महतोले गाउँमै पुगेर पीडित परिवारलाई किरिया खर्चका लागि जनही १० हजार सहयोग गरेकी छिन् ।
सोही क्षेत्रबाट जितेका संघीय सरकारका उपप्रधानमन्त्री राजेन्द्र महतोले भने शोक सन्देशमात्र जारी गरेका छन् ।
Copyright © All right reserved to webtvkhabar.com Site By: Sobij
