सर्लाही । वाम लोकतान्त्रिक गठबन्धनका तर्फबाट सर्लाही क्षेत्र नम्बर ३ का साझा उम्मेदवार नरेन्द्र साहले आफू माओवादी केन्द्रमा नवप्रवेशी नभएको बताएका छन् । गठबन्धनका तर्फबाट माओवादी केन्द्रले उम्मेदवार बनाएपछि केहीले नवप्रवेशी भनिएकोमा उनले टिप्पणी गरेका हुन् ।

समाजसेवी तथा सर्लाहीमा लोकप्रिय नेताको छवि बनाएका पूर्वसांसद साह २०७४ को चुनावमा गुलाब चिह्नबाट स्वतन्त्र उम्मेदवारी दिएका थिए ।

‘म २०५३ सालदेखि नै माओवादीमा समर्पित भएर लागेको हो ।’ सर्लाहीको हरिवन नगरपालिकास्थित नेकपा माओवादी केन्द्र ७ नम्वर वडा भेलालाई सम्बोधन गर्दै साहले भने, ‘कसैले मलाई भर्खरै माओवादी केन्द्रमा प्रवेश गरेको हो भन्नु भएको छ । तर, मेरो राजनीतिक इतिहास लामो छ ।’ सर्लाहीबाट धेरै नेता जन्मिए पनि यहाँ विकास नभएको उनले टिप्पणी गरे ।

साहले आउने मंसिर ४ गते हुन लागेको प्रतिनिधिसभाको चुनावमा आफूले जितेर गएपछि सर्लाही क्षेत्र नम्बर ३ लाई देशकै नमुना क्षेत्र बनाउने प्रतिबद्धता व्यक्त गरे । ‘पहिले हामी घुम्न काठमाडौं, पोखरा जान्थ्यौं,’ साहले भने, ‘अब हामी अन्य ठाउँबाट सर्लाही घुम्न आउँने बनाउँछौं ।’ आफूलाई भारी मतले जिताउन साहले जनतासँग अपिल गरे ।

यस्तै नेकपा माओवादी केन्द्र ७ नम्बर वडा कमिटि भेलामा बोल्दै पद्मा मोक्तानले वाम लोकतान्त्रिक गठबन्धनका तर्फबाट सर्लाही क्षेत्र नम्बर ३ का साझा उम्मेदवार नरेन्द्र साहको प्रशंसा गरिन् ।

‘उहाँले दुर्गम क्षेत्रमा खानेपानीको सुविधा प्रदान गर्न ठूलो योगदान दिनुभएको छ । उहाँ विकासप्रेमी नेता हो । हामीले खोजे जस्तो, रोजे जस्तो इमानदार नेता हो’, मोक्तानले सम्बोधनका क्रममा भनिन्, ‘अरू नेताहरू जस्तो कमाउ धन्दामा लाग्ने नेता होइन ।’

सर्लाहीस्थित नेकपा माओवादी केन्द्र ७ नम्वर वडा कमिटी, हरिवलने कार्यक्रमको आयोजना गरेको थियो ।

वाम लोकतान्त्रिक गठबन्धनका उम्मेदवारले जितेपछि विकासले रफ्तार लिन्छ : नरेन्द्र साह