वेबटिभी खबर
काठमाडौं । भारतीय यू-१७ महिला टोलीका सहायक प्रशिक्षक एलेक्स एम्ब्रोसमाथि यौन उत्पीडनको आरोप लागेपछि उनलाई पदबाट हटाइएको छ ।
सुप्रीम कोर्टद्वारा नियुक्त प्रशासक समिति (सीओए)का सदस्य एसवाई कुरैशीले प्रशिक्षकले यौन उत्पीडन गरेको पुष्टि गरेका छन् ।
कुरैशीले ट्विट गरेका छन्, ‘यू-१७ महिला टोलीका सहायक प्रशिक्षक एलेक्स एम्ब्रोसलाई यौन उत्पीडन आरोपमा बर्खास्त गरिएको छ । आगामी कारबाही प्रक्रियामा छ ।’
यसअघि नै सीओएले ३० जुनमै प्रशिक्षक एलेक्स एम्ब्रोसको पदबाट हटाउन संकेत दिएको थियो । तर प्रशिक्षकको नाम भने खुलाइएको थिएन । सीओएले बताएको थियो, ‘यू-१७ महिला टिममा दुर्व्यवहार भएको जानकारी आएको छ ।
टिम अहिले युरोप भ्रमणमा छ । अनुशासनको मामिलामा इन्डियन फुटबल शून्य सहिष्णुताको नीति राख्छ ।
प्रारम्भिक कारबाहीको रूपमा इन्डियन फुटबलले सम्बन्धित व्यक्तिलाई थप अनुसन्धानका लागि अस्थायी रूपमा निलम्बन गरेको छ ।’
यसअघि भारतीय खेलकुदमा यौन उत्पीडनको केस बाहिरिएको थियो । एक महिला साइकल खेलाडीले स्लोभेनिया भ्रमणमा प्रशिक्षकले अनुचित वार्तालाप गरेको आरोप लगाएकी थिइन् ।
यससँगै प्रशिक्षलाई पदबाट बर्खास्त गरिएको थियो । हाल उनको अनुसन्धान चलिरहेको छ । यस्तै अर्की खेलाडीले समेत विदेश भ्रमणमा आफूलाई प्रशिक्षकले यौन दुर्व्यवहार गरेको आरोप लगाएकी छन् ।
भारतीय टोली हाल युरोपमा आफ्नो अभ्यासका लागि रहेको छ । भारतले यसै वर्ष ११ मे देखि ३० अक्टोबरसम्म भुवनेश्वरी, गोवा र नावी मुम्बईमा यू-१७ महिला विश्वकप आयोजना गर्दैछ । जहाँ १६ देशको सहभागिता रहेको छ ।
Copyright © All right reserved to webtvkhabar.com Site By: Sobij
