वेबटिभी खबर
काठमाडौं । हिमानी ट्रष्टले जनकपुरधाममा विद्यार्थीहरूलाई खानेपानीका बोतल वितरण गरेको छ । पूर्वयुवराज्ञी हिमानी शाहको नेतृत्वमा सोमबार जनकपुरधामस्थित श्री सकल भवन कन्या माध्यमिक विद्यालयमा अध्यनरत छात्राहरूलाई पानी स्वतः शुद्ध गर्ने बोतल वितरण गरेकी हुन् ।
खानेपानी बोतल वितरण गर्न पुगेकी पूर्वयुवराज्ञी शाहले कन्या माध्यमिक विद्यालयमा अध्ययनरत छात्राहरूसँग छलफल गरी उनीहरूको मनोबल बढाएकी छिन् ।

विद्यार्थीहरूसँग छलफल गरेकी शाहलाई स्कुलका प्रधानाध्यापकले विद्यालयका भौतिक समस्याबारे जानकारी गराएका थिए । हिमानी ट्रष्टका संयोजक उत्तम निरौलाले आफूहरू पाँचवटा क्षेत्रमा काम गरिरहेको बताए ।
‘हामी फरक खालको कार्यक्रमको सुरुवात गर्न गइरहेका छौं । यसका लागि शिक्षाको केन्द्रबिन्दु मिथिला नगरी जनकपुरधामबाट सानो सुरुवात गरेका हौं,’ उनले भने ।
निरौलाले ट्रष्टले वितरण गरेको बोतलमा अशुद्ध पानी राखेपनि पानीमा भएको ब्याक्टेरिया, आर्सेनिकलगायतका पदार्थ नष्ट हुने भएकोले बोत्तल विद्यार्थीको स्वास्थ्यका लागि उपयोगी हुने स्पष्ट पारे । पूर्वयुवराज्ञी शाह ट्रष्टको कार्यक्रमको लागि आइतबार नै जनकपुरधाम पुगेकी थिइन् ।

Copyright © All right reserved to webtvkhabar.com Site By: Sobij