एजेन्सी
नयाँ दिल्ली । कोलकाताबाट मंगलबार राति चेन्नई उडेको इन्डिगो विमानको देब्रे इन्जिन बिग्रेपछि आपतकालीन अवतरण गरिएको छ ।
कोलकाताबाट २२४ यात्रु बोकेर उडेको विमान अवतरण गर्नु ठिक अघि एउटा इन्जिनमा खराबी आएको पाइलटले थाहा पाएका थिए । लगत्तै उनले चेन्नई विमानस्थलको हवाई ट्राफिक नियन्त्रणलाई सूचना दिए ।
अवतरणको केही मिनेट अघि मात्र इन्जिनमा खराबी आएपछि विमानस्थलमा तत्काल आपतकालीन सूचना जारी गरेर अवतरण गराइएको थियो । राति पौने १२ बजे उक्त विमान चेन्नई अवतरण गर्नुपर्ने थियो । भारतीय विमानस्थल प्राधिकरण अधिकारीहरूका अनुसार २२४ जना यात्रु बोकेर कोलकाताबाट चेन्नई जाँदै गरेको इन्डिगो उडान ६ई–७२३ को एउटा इन्जिनमा खराबी आएपछि आपतकाल लगाएर विमान अवतरण गराइएको हो । आपतकालीन अवस्थामा तोकिएको भन्दा सात मिनेट ढिलोगरी विमान सुरक्षित अवतरण भयो ।
विमान सुरक्षित अवतरण भएको १० मिनेटमै आपतकालीन अवस्था हटाएर विमानस्थल सहज सञ्चालनमा आएको थियो । अवतरणको तयारी गर्दा पाइलटले बायाँ इन्जिनमा खराबी भएको पत्ता लगाएको भारतीय सञ्चार माध्यमले जनाएका छन् ।
Copyright © All right reserved to webtvkhabar.com Site By: Sobij
