काठमाडौं । ब्राजिलका राष्ट्रपति जयर बोल्सोनारोलाई १० दिनदेखि लगातार बाडुल्की लागेपछि अस्पताल भर्ना भएका छन् । राष्ट्रपति कार्यालयले दिएको जानकारी अनुसार उनको आकस्मिक शल्यक्रियासमेत गर्नुपर्ने हुन सक्ने बताइएको छ । उनको आन्द्रा केही अवरुद्ध भयो कि भनेर परीक्षण गराउन ब्राजिलियाबाट साओ पाउलोको एक अस्पतालमा सारिएको छ ।

लगातार कुक्क-कुक्क भएर बाेल्न समस्या भएपछि बुधबार उनलाई ब्राजिलियास्थित सैनिक अस्पतालमा भर्ना गरिएको थियो । बोल्सोनारोको नियमित चिकित्सक डाक्टर एन्टोनियो लुइज माकेडोले बोल्सोनारोलाई थप उपचारका लागि साओ पाउलो लैजानु पर्ने बताएपछि त्यहाँबाट सारिएको हो । बोल्सोनारोका छोरा फ्लाभियोले सिएनएनसँग कुरा गर्दै ब्राजिलियामा उनको पेटमा भरिएको पानी निकाल्न सामान्य शल्यक्रिया गर्नुपरेको बताएका छन् ।  

ब्राजिल सरकारका एक वरिष्ठ अधिकारीले बोल्सोनारोलाई निन्द्राको औषधि दिएर साओ पाउलोको अस्पताल लगिएको जानकारी दिएका छन् । अस्पतालको श्ययाबाट बोल्सोनारोले तस्बिरसहित ट्विट गर्दै लेखेका छन्, ‘छिट्टै ठिक भएर फर्किनेछु ।’

- Estaremos de volta em breve, se Deus quiser. O Brasil é nosso! 🇧🇷 pic.twitter.com/3ohUwHBEHG

— Jair M. Bolsonaro (@jairbolsonaro) July 14, 2021

६६ वर्षीय बोल्सोनारोलाई राष्ट्रपतीय निर्वाचनको प्रचारका क्रममा सन् २०१८ मा चक्कु आक्रमण गरिएको थियो । यसपछि उनको पेटमा गम्भीर चोट लागेको थियो । चक्कु आक्रमणबाट घाइते भएका बोल्सोनारोको शरीरबाट ४० प्रतिशत रगत बगिसकेको थियो । त्यसयता उनले कैयौंपटक शल्यक्रिया गराइसकेका छन् । 

कोरोना भाइरसको महमारीलाई गम्भीर रुपमा नलिएको र उचित व्यवस्थापन गर्न नसकेको भन्दै बोल्सोनारोको आलोचना भइरहेको छ । यही महिनाको सुरुवातमा ब्राजिलमा राष्ट्रपतिविरुद्ध विशाल प्रदर्शन भएको थियो । प्रदर्शनकारीहरुले बोल्सोनारोले भारतबाट खरिद गर्न लागेको खोपमा भ्रष्टाचार गरेको आरोप लगाएका छन् । 

ब्राजिलमा भारतबाट खोप किन्ने सम्झौता स्थगित ब्राजिलमा भारतीय कोरोना खोप खरिदमा विवाद  ब्राजिलमा राष्ट्रपतिविरुद्ध देशभर प्रदर्शन