लन्डन । बेलायतमा कोरोना भाइरसको संक्रमण बढे पनि सामाजिक दूरी, अनिवार्य मास्क जस्ता सबै नियम हटाइएको छ । बेलायत कोरोना महामारीका समयमा सबै प्रतिबन्ध हटाउने विश्वको पहिलो देश बनेको छ । प्रतिबन्ध जुलाई १९ बाट पूर्ण रुपमा हट्ने छ । यसभन्दा अगाडि १२ जुलाईमा स्थितिबारे समीक्षा हुनेछ ।

बेलायती प्रधानमन्त्री बोरिस जोनसनले यसै साताको सुरुमा प्रतिबन्ध हट्ने घोषणा गरेपछि चारैतिरबाट विरोध भएको थियो । ट्विटरमा ह्यासट्याग ‘जोनसन भेरिएन्ट’ प्रयोग गर्दै प्रधानमन्त्रीले महामारीमा सबै नियम हटाउन हतार गरेको भनिएको छ । 

बेलायतमा डेल्टा भेरिएन्टको प्रसार बढेपछि लकडाउन कायमै रहन्छ वा हट्छ भन्ने अन्योल थियो । जोनसनले सबै प्रतिबन्ध हटाउने घोषणा गरेर लकडाउन अब लागू नहुने स्पष्ट पारेका छन् । मास्क पनि अनिवार्य लगाउनु नपर्ने भएको छ । 

अहिलेसम्म घरभित्र ६ जनाभन्दा बढी जम्मा हुन रोक लगाइएको थियो, अब जुलाई १९ देखि यो नियम पनि हट्दैछ । प्रधानमन्त्री जोनसनले जुलाई महिनामै दैनिक संक्रमित संख्या ५० हजार पुग्ने पनि बताएका छन् । उनले दुखद रुपले अझ धेरै मृत्युका लागि तयार हुन आवश्यक रहेको पनि बताए । उनले खोप लगाएर संक्रमण नियन्त्रण गर्ने प्रयास गरेकाले पनि लकडाउन लगाउन जरुरी नरहेको बताएका छन् । 

तर बेलायती मेडिकल एसोसिएसनका उपाध्यक्ष प्रोफेसर कैलाश चन्दले बोरिस जोनसनले लापरवाही गरेको भन्दै ट्विट गरेका छन् । बेलायतमा अहिलेसम्म ८५ प्रतिशत वयस्क व्यक्तिहरुले खोपको पहिलो मात्रा लिइसकेका छन् । वैज्ञानिकहरुले डेल्टा भेरिएन्टको संक्रमण र खोपको गतिबीच संघर्ष चलिरहेकाले भाइरसमाथि विजयी भएको दाबी गर्न कठिन हुने बताउँदै आएका छन् । 

कोरोना संक्रमण फैलिएपछि बेलायतमा करिब १६ महिनासम्म लकडाउनका विभिन्न नियमहरु लागू थिए । मंगलबार त्यहाँ २८ हजार ७ सय जना संक्रमित भएका थिए भने ३७ जनाकाे संक्रमणकै कारण ज्यान गएकाे छ । 

बेलायतमा जनवरीपछिकै सबैभन्दा धेरै संक्रमित भेटिए बेलायतमा पाँच महिनापछि एकैदिन २२ हजार संक्रमित  सामाजिक दूरी पालना नगरेका कारण बेलायती स्वास्थ्यमन्त्रीकाे राजीनामा