सर्लाही । मेयर र मन्त्रीको विवादले दुई पटक हाजिर भएलगत्तै सरुवा भएका प्रमुख प्रशासकीय अधिकृत तेस्रो पटक पुनः हरिपुर्वा नगरपालिकामा सरुवा भएर आएका छन् । यो पटक उनको सरुवा पनि कतिञ्जेल हो भन्ने अन्यौल कायम छ । बुधबार उपसचिव शम्भुप्रसाद यादवले हरिपुर्वा नगरपालिकाको प्रमुख प्रशासकीय अधिकृतको जिम्मेवारी सम्हालेका हुन् । 

कांग्रेसबाट जितेका मेयर विनोद साह र खानेपानी मन्त्री महेन्द्र राय यादवको विवादका कारण लामो समयदेखि हरिपुर्वा प्रमुख प्रशासकीय अधिकृत विहीन बनेको थियो । प्रमुख प्रशासकीय अधिकृत नभएकै कारण चालु आर्थिक वर्षमा उक्त नगरपालिकामा कार्यरत शिक्षक तथा कर्मचारीले साउन यताको तलब पाएका छैनन् । नगरपालिकाको नगरसभा समेत हुन सकेको छैन । सामाजिक सुरक्षा भत्ता पनि रोकिएको छ । 

मन्त्री यादवको घर हरिपुर्वा नै भएकाले उनी आफू अनुकुलको प्रमुख प्रशासकीय अधिकृत ल्याउन चाहन्छन् भने मेयर साह आफू अनुकुलको ल्याउन चाहन्छ । दुई जनाको द्वन्द्वले नगरसभा समेत हुन नपाउँदा नगरपालिकाको विकास निर्माण ठप्प भएको छ । मेयर र मन्त्रीको विवाद भएकाले कुनै पनि उपसचिव हरिपुर्वा आउन नचाहने अवस्था बनेको थियो ।

कोही पनि उपसचिव हरिपुर्वा जान नमानेपछि संघीय मामिला तथा समान्य प्रशासन मन्त्रालयले ९ महिना भित्र तेस्रोपटक लागि उपसचिव शम्भुप्रसाद यादवलाई नै हरिपुर्वा नगरपालिकामा पठाएको हो । यसअघि यादव बैशाख १७ गते हाजिर भएको एक घण्टा मै सरुवा भएका थिए । त्यसको ५ महिना पछि पुनः असोज १७ गते उनी नगरपालिकामा हाजिर भएका उनको २४ घण्टामै पुनः अन्यत्र सरुवा भयो । 

यसपटक फेरि यादवलाई मन्त्रालयले मंसिर २८ गतेको निर्णय र चलानी नम्बर १२२३ को पत्र अनुसार हरिपुर्वा नगरपालिकामा पठाएको हो । उनको सरुवाबाट मन्त्री यादव खुसी छैनन । मन्त्री यादवले यसअघि प्रधानमन्त्रीको सचिवालय मार्फत उनको सरुवा बदर गर्न दबाब दिलाएका थिए । कोही जान नमानेपछि मन्त्रालय शम्भुलाई नै पठाउन बाध्य भएको हो । तर यो पटक पनि मन्त्री यादव उनको सरुवा बदर गराउन लागि परेको स्रोतले बतायो । ‘मन्त्रालयको जिम्मेवारी पाएको जनमत पार्टीका अध्यक्ष डा सिके राउतलाई मन्त्री यादवले दबाब दिने प्रयास गरेका छन,’ स्रोतले भन्यो, ‘तर यो पटक दबाबले काम गर्दैन । डा राउत दुई नेताको गाउँले विवादलाई सुन्ने पक्षमा हुनुहुन्न ।’