न्यापिड । म्यान्मारकी प्रजातन्त्रवादी नेतृ आङसाङ सुकीलाई नियन्त्रणमा राखिएको चार महिनाभन्दा बढी समयपछि अदालतमा सुनुवाईका लागि लगिएको छ ।  

उनीविरुद्ध लगाइएका आरोपहरुमाथि सोमबारदेखि सुनुवाई सुरु भएको सरकारी अधिकारीहरुले जानकारी दिएका छन् । सत्ता नियन्त्रणमा लिएको म्यान्मारको सेनाले ७५ वर्षिया नेतृ सूकीलाई अनियमितता गरेको लगायतका विभिन्न आरोपहरु लगाएको छ । 

उनीसँगै अन्य नेता तथा उच्च अधिकारीहरूलाई पनि सैन्य सरकारले विभिन्न मुद्धाहरू लगाएको छ । मंगलबार हुने सुनुवाईका क्रममा नेशनल लिग फर डेमोक्रेसी (एनएलडी)का नेताहरू पनि उपस्थित हुने जनाइएको छ । 

नेतृ सुकीका एक वकिल खिन मौङ जावले देश, जनता र प्रजातन्त्रका लागि गरेको योगदान र संघर्षका विरुद्धमा दाग लगाउन सैनिक सरकारले अनेक आरोपहरु लगाएको टिप्पणी गरे । म्यान्मारको जुन्ता सरकारले गत हप्ता पनि नेतृ सुकीका विरुद्धमा नयाँ आरोपहरूसहितको मुद्दा दर्ता गरेको थियो ।  

म्यान्मारमा गत फेुब्रअरी १ मा सेनाले विभिन्न दलका नेता तथा सरकारका उच्च अधिकारीहरुलाई नियन्त्रणमा लिएको थियो । नेताहरुलाई हिरासतमा राखेर सेनाले सत्ता नियन्त्रणमा लिएको घोषणा गरेको थियो ।  

सेनाले सत्ता हातमा लिएसँगै म्यानमारमा अहिलेसम्म पनि नागरिक आन्दोलन भइरहेको छ । आन्दोलनका क्रममा अहिलेसम्म ८४० भन्दा बढीको मृत्यु भइसकेको छ भने अरु सयौं घाइते भएका छन् । 

सुरक्षाकर्मीहरुले दर्जनौं आन्दोलनकारीहरूलाई नियन्त्रणमा लिएको छ भने कैयौंको खोजी भइरहेको जनाएको छ । गत नोभेम्बरमा भएको निर्वाचनमा अपेक्षित नतिजा आफ्नो पक्षमा नआएपछि सेनाले निर्वाचनमा धाँधली भएको भन्दै असन्तुष्टि जनाउदै आएको थियो । त्यही असन्तुष्टिको पृष्ठभूमिका नयाँ संसदको बैठक बस्ने अघिल्लो रात सेनाले सत्ता नियन्त्रणमा लिएको हो । 

सेनाले गत निर्वाचन धाँधलीपूर्ण भएकाले चाडै नै निष्पक्ष निर्वाचन आफ्नो सरकारले गराउने र सत्ता छोड्ने दाबी गरेको छ । निर्वाचनका लागि भन्दै जुन्ता सरकारले एक वर्षे संकटकाल पनि घोषणा गरेको छ ।

सेनाको दाबीप्रति भने आम नागरिक र विश्व समूदायले भने आपत्ति जनाउँदै आएका छन् । उनीहरूले तत्काल लोकतान्त्रिक प्रक्रियाबाट आएका नेताहरुलाई नै सत्ता हस्तान्तरण गर्न माग गर्दै आएका छन् । 

म्यान्मारकी नेतृ सुकीविरुद्ध भ्रष्टाचारको गम्भीर मुद्दा दर्ता  म्यान्मारः सत्ता विद्रोहपछि नेतृ सुकी पहिलोपटक अदालतमा उपस्थित आङ सान सुकीको पार्टी खारेज हुन सक्ने सम्भावना म्यान्मारः आङ सान सुकीविरुद्ध ६ नयाँ फौजदारी अभियोग आङ सान सुकीले अवैध ढंगले पैसा लिएको सेनाको आरोप