वेबटिभी खबर
दक्षिण अफ्रिकाका अनुसन्धानकर्ताहरुले एक एचआइभी संक्रमित महिलामा कोरोना भाइरसको सम्भावित खतरनाक उत्परिवर्तन फेला पारेका छन् । एचआइभी संक्रमित ३६ वर्षीया महिलाको शरीरमा कोरोना भाइरस २१६ दिनसम्म ३२ पटक उत्परिवर्तन भएको भेटिएको छ ।
मेडिकल जर्नल मेडआरभिक्समा यो रिपोर्ट (पियररिभ्यू नभएको) बिहीबार छापिएको थियो । ती महिलालाई सन् २००६ मा एचआइभी भएपछि कमजोर हुँदै गएकी थिइन् । उनलाई सन् २०२० को सेप्टेम्बरमा कोरोना भाइरसको संक्रमण पनि भयो । यसपछि उनको शरीरमा कोरोना भाइरसको १३ पटक म्युटेशन र अरु भाइरस परिवर्तन गर्ने १९ वटा आनुवाशिंक उत्परिवर्तित भाइरस भेटिए ।
उनको शरीरमा भेटिएका भाइरस भेरिएन्टमा केही चिन्ताजनक पनि थिए, जसमा उत्परिवर्तित E484K थियो । यो बेलायतमा भेटिएको अल्फा भेरिएन्टको एक स्वरुप हो । अर्को दक्षिण अफ्रिकामा भेटिएको बिटा भाइरसको उत्परिवर्तित स्वरुप N510Y छन् । यी दुवै भेरिएन्ट उच्च संक्रामक हुन् ।
अनुसन्धानकर्ताका अनुसार ती महिलाबाट यी स्वरुपका भाइरस अन्य व्यक्तिमा सरेको छ वा छैन भनेर पुष्टि भएको छैन । नयाँ वेरिएन्टहरू दक्षिण अफ्रिकाको क्वाजुलु नेटल जस्ता क्षेत्रहरूबाट देखा परेका छन्, जहाँ ४ जनामध्ये एक वयस्क व्यक्ति एचआइभी संक्रमित छ । एचआइभी संक्रमित व्यक्ति कोरोना भाइरसको संक्रमण र गम्भीर बिरामी हुन सक्ने प्रमाणहरु कमै भए पनि भाइरसको उत्परिवर्तनका लागि उपयुक्त स्थान बन्ने सक्ने अनुसन्धानले बताएको छ ।
डारबनको क्वाजुलु नेटल विश्वविद्यालयका आनुवाशिंक विज्ञ एवं यस अनुसन्धानका लेखक टर्बियो ओलिभिराले एलए टाइम्सलाई बताएअनुसार अन्य संक्रमितको तुलनामा प्रतिरोधात्मक क्षमता कमजोर भएका बिरामीहरुमा कोरोना भाइरस लामो समयसम्म रहन सक्छ । अनुसन्धानकर्ताहरुले मृत्युदर घटाउन, कोरोना भाइरसका नयाँ भेरिएन्ट बन्न नदिन र एचआइभी सर्न नदिन जोखिममा रहेका समुदायहरु एचआइभी नभएका, एचआइभी भइसकेका दुवै व्यक्तिमा कोरोना परीक्षण एवं उपचार तीव्र पार्नुपर्ने सुझाव दिएका छन् ।
Copyright © All right reserved to webtvkhabar.com Site By: Sobij
