वेबटिभी खबर
जाकार्ता । इन्डोनेसियामा जारी रहेको फुटबल खेलका क्रममा भएको हिंसामा परेर एक सय २७ जनाको ज्यान गएको छ । खेल हेर्न गएका खेलका पक्षधरहरूका बीचमा भएको हिंसामा परेर ती व्यक्तिको ज्यान गएको प्रहरी अधिकारीले जानकारी दिएका छन् ।
इन्डोनेसियाको पूर्वी जाभा प्रान्तको मलाङ भन्ने स्थानमा भएको सो खेलका क्रममा सो खेलका समर्थकहरूका बीचमा हिंसा भड्किएको थियो । हिंसामा परेर एक सय २७ जनाको ज्यान गएको र अरू कैयौँ घाइते पनि भएकाे जनाइएको छ ।
इन्डोनेसियाली प्रहरीलाई उद्धृत गर्दै विभिन्न अन्तर्राष्ट्रिय समाचार संस्थाहरूले बताएअनुसार खेलका क्रममा एक खेलका पक्षधरले आफ्नो पक्षको हार सहन नसक्दा यस्तो घटना भएको थियो ।
इन्डोनेसियाको पूर्वी जाभा प्रान्तका प्रहरी प्रमुख निको अखिन्ताले दिएको सूचनामा खेलमा हार खाएको एक पक्षका समर्थकहरूले हार सहन नसकेर हिंसा मच्चाएका थिए । त्यसपछि त्यहाँ जम्मा भएको भीडमा भागदौड पनि मच्चिएको थियो । भागदौडमा परेर करिब दुई सय जना घाइते पनि भएका जनाइएको छ ।
हार्ने पक्षका समर्थकहरूले पिचमा आक्रमण गरेका थिए । त्यसलगत्तै प्रहरीले पनि भीड नियन्त्रण गर्नका लागि अश्रूग्याँस प्रहार गरेको थियो । प्रहरीले अश्रूग्याँस हानेपछि सो खेल हेर्न त्यहाँ जम्मा भएका भिडका बीचमा भागदौड भएको थियो । धेरै जसो मानिस भागदौडमा परेर ज्यान गुमाएका थिए ।
Copyright © All right reserved to webtvkhabar.com Site By: Sobij
