वेबटिभी खबर
जाजरकोट । आकाशे पानीको भरमा लगाइने मकैबाली पानी नपर्दा जाजरकोट, रुकुम पश्चिम र डोल्पाका किसान समस्यामा परेका छन् ।
सिँचाइ सुविधा नभएका कारण आकाशे पानीकाभरमा मकैखेती गर्दै आएका किसानले वैशाखको अन्तिमसम्म पनि मकै रोप्न नपाएका हुन् ।
पहाडी भू-भागका साथै भिरालो जमिन भएका कारण यहाँ नहरको पानीले सिँचाइ गर्न मुस्किल छ । पाइपमा पानी लगेर सिँचाइ गर्न सकिने भएपनि पाइपको अभावमा सिँचाइ गर्न नसकिएको नलगाड-८का शेरबहादुर खत्रीले बताए ।
वैशाखमा मकै रोप्न नसके उत्पादनमा भारी गिरावट आउने गर्दछ । केही हुने खाने स्थानीय बासिन्दाले सिँचाइ गरेर मकै रोपेपनि अन्य किसानको खेतबारी बाँझिएको खत्रीले बताए ।
त्यस्तै खेतमा धानको ब्याड राख्ने समय सुरु भएपनि पानीकै अभाव उक्त काम प्रभावित भएको छ । असिनाले गहुँबालीमा क्षति पुर्याएका कारण पीडित भएका किसान मकै रोप्ने तयारीमा थिए ।
Copyright © All right reserved to webtvkhabar.com Site By: Sobij
